O sábado 30 de setembro tivo lugar a Baixada do Río Umia, aprazado esta temporada pola falta de auga do río. Esta problemática tamén fixo que o circuíto tivese que cambiar, xa que a saída tivo lugar na praia fluvial de Oubiña, ciaboga na ponte de Barrantes e meta a altura do clube Náutico O Muíño de Ribadumia, facendo un percorrido de 8 quilómetros.

A victoria na categoría do K1 masculino, que foron os primeiros en dar a saída, foi para o padexeiro do Club Ciudad de Lugo, Ramón Fernández, doce segundos por diante do portonovés Iván Domínguez, do Club Cofradía de Pescadores de Portonovo. A terceira posición sería para o vilaboés Diego Castro, do Club de Piragüismo Vilaboa. Non obstante, o mellor tempo da baixada sería para o veterano das Pontes, Antonio Polo, cun tempo de 00:30:28,00, liderando así a categoría de veterano, acompañado no podio por Bernardo Sánchez e Adrían Jubón, ambos do Fluvial de Lugo. A primeira praza da canoa masculina sería para o arousán Yeray García, do Club de Piragüismo Illa de Arousa, a segunda posición da categoría sería para Carlos Picón, e o terceiro para Adrián Sieiro, os dous do Club Náutico O Muíño. A mellor no K1 feminino foi Nuria Romero, do Club de Piragüismo Ciudad de Lugo, a segunda posición sería para Emma Devesa, do mesmo club que a campiona, e a terceira praza foi para Sabela Castro, da Escuela de Piragüismo Outes, pero ex padexeira do Ciudad de Lugo. A victoria do C1 feminino sería para a canoísta do Kayak Tudense, Cristina Soutelo, e a medalla de prata e bronce serían para padexeiras do Náutico O Muíño, María Perez e Carla Sieiro.

A nivel de clubes, a victoria foi para o Náutico de Cobres; a segunda posición foi para o club residente, o Náutico O Muíño, o terceiro foi o Kayak Tudense, cuartos foron os da Cofradía de Pescadores de Portonovo, e a quinta praza foi para o Club de Piragüismo Ciudad de Lugo.